Guetar n'esti blogue

sábado, 16 de mayo de 2015

El home marín



     Dende lo altu la islla la arrecha forma del faru desafía’l temporal. Imperturbable, nun cesa nel llabor, unviando a la mar el so rayu de lluz a la gueta dalguna nave perdía. A los pies, nos prietos cantiles, escachen les foles ensín da-i respiru. Ente turbonaes de vientu que tarazen la mar con milenta llínies blanques, llega una fola. Subi p’ente les peñes del pedreru, esguilando cantil arriba llanzando cachones en toles direiciones. Golpea escontra la roca con ruxíu prolongáu. Dempués, retirándose de vuelta a la mar, el crepitar de la efervescencia, de les burbuxes d’aire qu’escapen d’ente los requexos de les peñes, del agua que vacía’l espaciu ente los regodones. El blancu mantu d’agua burbuxeante que dexa la mar que fuxe. Pero nun ye una retirada definitiva. La siguiente fola aporta ocupando’l tarren dexáu pola anterior, y vuelta a empezar.

     Pente les cueves, a los pies de los cantiles entra la mar. Puxa’l aire que sal a presión por un furacu nel techu. El soníu, el salitre qu’esparde perende, la fuerza del bufíu asusta. Naide nun ye a acercase. Pero nun ye namás que la bravura de la galerna la que amedrenta a la xente. Güei ye nuechi de galerna. Güei ye la nuechi del home marín.


     Ye la mar fonte inacabable de mitos y lleendes, munchos de los cuales repitense en cualisquier llugar del planeta. El so desconocimientu, la enorme complicación que supón la navegación en tiempos nos que’l satélite, el radar o les cartes elleutróniques nun pudieren ser más que obres del Diañu, asina comu la indefensión ante les fuercies desataes n’una mar embravecía llevaba a la xente de mar a creyer na esistencia de munchos seres que desplicaren lo que asocedía. Asina, amás de les famoses serenes que encantaben a los marinos colos sos cantos hasta facelos naufragar en baxos y cantiles y los monstruos xigantescos que afundíen les naves, esistía toa una riestra de seres que poblaben los fondos marinos: tritones, xigantes, culiebres...

Serena nel capitel de la ilesia de San Vicente de Serrapio, nel conceyu Ayer.
     N’Asturies ye curiosu que, pesie a ser un territoriu de atávica rellación cola mar, los mitos y lleendes marines tan angüeñu menos espardíes que les terrestres. Mientres que’l Cuélebre, el Nuberu o la Xana son perconocíos, el Pataricu o’l Home marín alpenes atopen sitiu nel recuerdu de la xente. Caltiense vivu, eso sí, en dalgunos llugares concretos de la xeografía. Curiosamente, estos llugares non siempre tan na cercanía de la costa.

     Por toa Europa esisten munchos mitos d’homes pexe, pero nun toos son iguales. Bona parte d’ellos fain referencia a los tritones, seres metá home metá pexe, al xeitu del machu de la serena. Sin embargu, mayoritariamente espardíos pola Europa atlántica, fain referencia a unos seres que, pesie a vivir nel agua, caltienen les dos pates y la forma humana, pero tienen el cuerpu cubiertu d’escames, la testa calva ya’l pelu les barbes enguedeyáu con algues. Además, tien nel so haber un falu de grandes dimensiones. Aunque en d’ambos casos atopámonos con homes pexe, en realidá taríamos ante dos mitos distintos, y non solu pola diferencia anatómica, sinón pola mesma naturaleza del ser.

     El home marín nun ye’l machu de la serena. Más aún, nin siquiera esiste fema pa esti ser, polo que, presa de gran luxuria, tien que adentrase na tierra a la gueta de dalguna muyer a la que violentar y satisfacer asina la so ansia sexual, ensin que estos alcuentros supongan la concepción d’ún vástagu. Nun tienen finalidá reproductora sinón simplemente lasciva. El home marín ye además un ser básicamente malignu, del que tóo lo que se diz ye cosa mala. Por otru lláu, nun siempres tamos ante un ser d’otru mundiu, sinón que munches vegaes desplícase el home marín como la hestoria d’ún home normal que un día adentrose na mar pa nun tornar, adautándose al mediu y sofriendo delles tresformaciones comu la piel escamosa.

El home marín, illustración del etnógrafu Alberto Alvarez Peña

     Esta última axústase al que de xuru ye’l casu más conocíu d’home marín nel Cantábricu, el del home pexe de Liérganes, en Cantabria. La hestoria recoyola el Padre Feijóo na so obra “Teatru críticu universal” y ye curioso, que siendo esti gran eruditu tan críticu col irracionalismu, la mitoloxía y la superstición, diera-i verosimilitú a esta hestoria ensín ponela en cuestión apurriendo amás una bayura de datos y detalles increíble. Resumiendo, la hestoria del home pexe de Liérganes ye la que vien darréu:

     En Liérganes, pueblu cántabru a la vera´l ríu Miera, vivía a metanes del sieglu XVII (la obra de Feijóo foi escrita ente 1726 y 1740) un matrimoniu formáu por Francisco de la Vega y María de Casar con cuatro fíos. Tras morrer el maríu la muyer unvió al segundu de los fíos a Bilbao a deprender el oficiu de carpinteru. Tando ellí el rapaz, llamáu Francisco de la Vega y Casar, na viespora de la nuechi San Xuan de 1674, foise nadar con unos collacios al ríu. Dempués de desnudase el mozu metiose nel agua y púnxose a nadar ríu abaxu hasta desapaecer. Como paez ser que yera bon nadador los collacios nun se preocuparen d’elli hasta pasaes delles hores. Como nun tornara pensaren que se hubiere afogao.

     Cincu años dempués, en 1679, unos pescadores gaditanos alvirtieren un estrañu con aire humanu que nadaba nes cercaníes, pero al dir a acercase desapaecía ente les foles. Esta misteriosa conducta repitiose durantre varios díis deseguíos hasta que, a la fin, foron a apresalu tres de echai pedazos de pan a mou de cebu y cercalu coles redes. Al subilu, vieron con sospresa que yera un mozu roxu, fuerte, cola piel pálida ya una riestra escames que-i cubría’l espinazu y otra que dende’l pescuezu baxaba-i hasta’l estómagu. Los pescaores llevaren al mozu hasta’l conventu de San Francisco au lo esconxuraren e intentaren saca-i dalguna información ensín más ésitu que la pallabra “Lierganes”. Enteraos por un montañes afincáu en Cadiz que ellí esistía un pueblu con esi nome y que cincu años antes hobiere desapaecío na mar un mozu llamáu Francisco de la Vega decidieron retornalu pa eses tierres por si daquién lu conociera.

     El casu ye que al llegar al pueblu dirixose dafechu a la casa au vivía María del Casar con dos fíos que reconocieren n’elli al so hermanu Francisco. Durantre 9 años Francisco vivió en Liérganes ensín falar más que unes poques pallabres pa pidir comida, vinu o tabacu. Nun se vistía o calzaba sinón-i lo mandaben y non mostraba interés por ná. Finalmente, un bon día volvió a desapaecer adentrándose na mar sin que volviere a sabese d’elli.

Escultura que representa a Francisco de la Vega y Casar, el home pexe de Liérganes

     La hestoria del home pexe de Liérganes comu ya se dixere difier del mitu asturianu. Al home silente, inofensivu del relatu de Feijóo contraponse-i el del ser malignu de les costes asturianes que france los apareyos de los pescadores, escuerre a les muyeres pa satisfacer les sos baxes pasiones y gusta de comer la carne de los neños. Muévese cola mesma facilidá por mar y por tierra y tamién da-i por prender fueu a payares y colleches.

     El recuerdu del home marín entá se caltién en llugares del centru oriente d’Asturies como Colunga o Llastres, si bien lo ciertu ye que ye na fastera occidental, en Tapia, en Puertu de Veiga o El Franco au lo fai con mayor punxu. En Tapia, diz la tradición que hebía un pozu nel llugar que angüañu se alcuentra la Plaza del Maestru Baldomero Pérez Martínez. Esi llugar yera conocíu comu la Plaza das Covas, y se dicía que comunicaba coles cueves de la playa de Ribeiría o de las Furadas, ente les cuales taba la Cova sin fin, na que vivía, o buscaba refuxu el home marín nes nueches de galerna. Los guajes, a móu de xuegu pa demostrar la valentía, averábense a la cueva canciando una coplina:
 
Home marín,
home marín,
sale da cova
y cómeme a min.

     Ente los relatos recoyíos polos estudiosos del folclore local, llama la atención el recoyíu por Jesús Evaristo Casariego, nel que refier que nos díis de turmenta, un home del mare de L.luarca subía al conceyu Tineo col sátiru enfotu d’atacar a les moces. Asina, en 1799 diose el casu de que apaeciera una muyer esfondada, gravemente fería, a resultas de lo cualo terminara morriendo. Nun se atopare culpable dengún polo que al final achacose a un asaltu del home marín. Amestando sucesos reales, el desconocimientu ciertu de los fechos asocedíos y la tradición local terminamos por tener un mitu vivu.

La costa astur, escarpiada y llena de cueves y furados, yera un llugar ideal pa que se abellugaren los homes marinos durantre les nueches de galerna

     Del vecín conceyu de El Franco, recoyío na obra “El Franco y su concejo” de Marcelino Fernández y Fernández, vien otra hestoria del home marín. Les moces del llugar tinían que dir a por agua a una fonte cerquina d’una playa. Un home marín siguiales, xixilando y quedándose al acechu. Si dalguna quedaba sola esti ser apresábala pa abusar d’ella. Delles vegaes lo fixera, polo que los vecinos fixeron por dai caza. Llograronlo tres dellos intentos, conduciendo al home marín a prisión, onde terminara morriendo de pena al vese priváu de llibertá y tar llueñe de la mar. 

     Quiciaes nos sirva esti últimu relatu pa establecer una comparanza cola salú del mitu angüañu. Alloñao de la mar el home marín termina languideciendo na so celda hasta morrer, asina como languidez el so recuerdu ente la memoria coleutiva del pueblu asturianu, principalmente d’aquel que mora a orielles de la mar.

1 comentario: