Los horros de Bermiego

Dexando atrás el conceyu Proaza, al pocu d’ingresar en tierres quirosanes, a manzorga, al final d’una pindia carretera con grandes revueltes, alcuéntrase el famosu pueblu de Bermiego. Famosu pol so Teixu, el milenariu que se alcuentra a la vera la Ilesia de Santa María, o’l desapaecíu rebollu, al llau de la ermita de la Virxe del Carme, que morriera va unos años. Pero si esos árboles fixeronlu perconocíu ente los asturianos nun ye menos que la bayura de cases y cuadres, horros y paneres, molinos y fornos, fontes y llavaderos, fain d’esta aldea quirosana un braeru muséu etnográficu viviente. 

De lo munchu que tien por ver, vamos falar equí del elementu más destacáu, el de los horros y paneres. 

A parte de destacar el conxuntu polo abondoso d’estes construciones (32 en total) asina comu pol bon estáu nel que alcuéntrense la mayoría d’elles, si daqué les fai especial ye la decoración pictórica que presenten munchos d’ellos.

Arquitectónicamente, los horros encuadraríanse nel tipu “villaviciosa”, con una data d’orixe que’n munchos dellos pudiere retrotraese a los sieglos XVI y XVII. Son, xeneralmente, bastante cenciellos, ensín correores nin barandes, munchos ensín tentemozos, namás que con puerte nun lláu y talambera pa subir. Nun se albidran talles na maera más alló del arcu que corona dalgunes puertes. Hai dellos exemplares que albídrense más modernos, incorporando elementos comu los correores y barandes, bien fuere por ser una construción más tardía (sieglu XVIII n’adelantre) o por ser reformes postreres.

Magar que toles construciones, pol simple fechu de ser lo que son tienen ya el so propio valir, son los exemplares que amuesen les decoraciones pictóriques aquellos que realcen la importancia del conxuntu penriba de los que se conserven en otros munchos pueblos asturianos. A continuación fadremos una amuesa de los exemplares que tienen esti tipu d’arte en lliños y colondres. Quiciaes nun tean tóos porque siempre se pue escapar algún, pero nos que tan puen atopase casi toos les variantes de ornamentaciones pictóriques que se alcuentren n’esti tipu d’horros por Asturies.

Dientro’l pueblu, la mayor parte de los horros concentrense nun mesmu espaciu, nel cual atopense casi toos los que presenten esti tipu decoraciones. Otros, pero en munchu menor númberu, espardense por tola estensión de Bermiego. Son n’estos del centru, probablemente los de orixe más antigüu (s. XVI) los que presenten mayor proporción de pintures.

Un de los primeros horros que se atopen na parte central del pueblu presenta los cuatru lliños decoraos, ca ún con motivos distintos, y n’algún casu, col lliñu dixebráu con dos debuxos distintos. Asina, nel lliñu que mira’l sur, puen vese una sucesión de zig-zags en blancu y prietu que enllenen toa la llonxitú del lliñu. Sicasí, a metanes de la parede esta serie xeométrica vese acompangada por una decoración de aspes allargaes formaes por series de triangulos blancos y prietos (tradicionalmente conozse a esti motivu como ringo-rango). Estes aspes superponense totalmente a les llínies en zig-zag anteriormente citaes, lo que pudiere facer pensar que se tratare de una decoración postrera. N’esta parede nun se albidren más detalles ornamentales nin en engüelgos, ni en colondres. 

Lliñu Sur decoráu con motivos de zig-zag

Lliñu Sur decoráu con los zig-zag y, superpuestos, les aspes de triángulos blancos y prietos.

 Rodiando el horru, pasando a la cara E, pué atopase una decoración distinta a les anteriores. N’esti casu, la primera metá del lliñu adórnase con una serie de semicírculos secantes blancos, sobro una doble llínia de triángulos prietos y blancos. Hai que notar que estes llínies non son simétriques una respeuto la otra, sinón que tan desplazaes pa que’l triángulo prietu de la superior coincida con un blancu na inferior. Esta doble banda percorre el lliñu de cabeza a cabeza. La segunda metá presenta otra decoración consistente en bandes de triángulos blancos y prietos a semeyanza de les dos llínies citaes, cuntabilizando un total de 6, magar que la más cimera, la que se alcuentra baxo’l teyáu, tien una llonxitú menor y nun ye contínua, adaptándose a la forma de la viga.

Lliñu Este, con decoración de semicírculos secantes y llínies de triángulos. Hexafolia nel engüelgu y banda xeométrica.

 Esta parede si tien además, otres decoraciones, pues nos engüelgos amosa dos figures xeométriques, a manzorga una flor del agua o hexafolia prieta sobro fondo blancu, mientres que a mandrecha amuesa un discu solar o polisquel. Tamién se aldovina un semicírculu de triángulos blancos na colondra central. Por últimu, tola parede ta cruciá por una banda xeométrica.

Lliñu Este, decoración con seis tires de triángulos, polisquel y banda xeométrica.

La siguiente parede, la cara norte, presenta una decoración de semicírculos tanxentes blancos, enmarcaos por dos llínies de triángulos blancos y prietos. Esta decoración caltiénse en tola llonxitú del lliñu. Ensin embargu, de les dos llinies cimeres, la superior, alcuéntrase namás que debuxá na parte inferior del durmiente, el llargeru de maera que tien penriba el lliñu y sobro’l que sofitáse la maera del teyáu. Otra cosina a destacar, y que pué pasar fácilmente desapercibía, ye la presencia de la figura d’ún caballu en posición rampante na colondra central que separta les puertes. Magar que s’encuentre semi esborriá pol tiempu y la climatoloxía, entá ye posible albidrala, guardando muncha semeyanza coles que puen vese n’otres construciones de la zona, comu en Banduxu.

Lliñu Norte. Decoración con motivos de semicírculos tanxentes y greques de triángulos

Lliñu Norte. Nel circulu blancu albídrase la figura d'ún caballu rampante parcialmente esborriáu.

 Cerquina, atópase otru horru que tamién tien decoración pictorica, magar que en cantidá, variedá y estáu de conservación, más probe. El lliñu sur ta decoráu con una serie de aspes de triángulos prietos inscrites en casetones rectangulares formaos tamién por series de triángulos. Nun se albidra pintura blanca. Esti motivu repítese tamién nel lliñu de la parede norte, na metá izquierda del mesmu, mientres que la drecha ocúpala una serie de semicírculos secantes o entellazaos. Del mesmu mou tan dambos pintaos namás que en color prietu.

L'horru citáu

Lliñu Sur. Decoración de aspes de triángulos prietos.

 

Nos engüelgos puen acolumbrase tamién debuxos parcialmente esborraos. Na manzorga una hexafolia inscrita nun circulín de triángulos prietos, y na colondra central, un trisquel inscritu xunto a otra figura de caballu rampante. Por baxo aldovínase la antigua presencia d’una inscripción, probablemente faciendo referencia a la construción del horru, pero de más que abegosa llectura. Asina mesmo, tamién se percibe una banda xeométrica que cruciaba de lláu a lláu, pero güei ta casique totalmente desapaecía. 

Lliñu Norte. Decoración con semicírculos entellazaos y series de triángulos. A mandrecha trisquel inscritu. Dientro'l círculu roxu otru caballu rampante abondo esborriáu y, embaxo nun cuadráu roxu, restos d'una inscripción.

  

Por últimu, na cara oeste, cubierta con una baranda muy posterior al horru, vuelven a encontrase los mesmos motivos del lliñu anterior, con aspes y semicírculos entellazaos pintaos namás que con color prietu.

Lliñu Oeste. Más semicírculos secantes de triángulos sobro llínies cuadriculáes.

Finalmente, esti mesmu tipu de decoración atoparemosla n’una de les paneres que formen esti conxuntu en metanes del pueblu. De nueves atopamos los lliños decoraos con semicírculos entellazaos compuestos por riestres de triángulos prietos xunto a llínies cuadriculaes. Atopamos igualmente les aspes, de la mesma fechura que les anteriores, sólo que n’esti casu los espacios internos tan enllenaos por debuxos de llínies que asemeyen la planta del trigu. El lliñu que meyor conserva la ornamentación ye’l que tien les puertes.

Panera decorada

Decoración de la panera, con semicírculos entellazaos.

Aspes de triángulos y llínies asemeyando la espiga del trigu

 

El restu del pueblu, comu ya se dixere, tien dellos horros, munchos de los cuales carecen de decoración pictórica significativa, bien porque nunca la tuvieren, bien porque s’esborriare col tiempu. En dalgunos casos, la ubicación en propiedaes privaes, la presencia de maleza, o la construción de galeríes nun permite albidrar la esistencia o non d’esti arte popular.

Dempués de ver los diferentes exemplares d’ornamentos que puen afayase en Bermiego, ún pue parase a pensar el motivu que llevó a los paisanos de hai tres o cuatru sieglos atrás a plasmalos en estes construciones. Esti ye quiciabes el puntu más escuru del asuntu, porque, si bien ye ciertu que munchos elementos puen tener un calter máxicu-protector que vendría de dómines perantigües, probablemente anteriores al espardimientu del cristianismu por Asturies (trisqueles, círculos solares, hexafolies), y que otros pudieren llevanos a una imitación del arte prerrománicu y románicu tan espardíu polos templos rurales (los semicírculos ya’l ringo-rango) lo cierto ye que sedría casique un auto de fé el dar una razón pa que ellí los punxeran. Quiciaes protexer lo que n’ellos guardaben, lo más preciao que tiníen, la collecha que yos daba la vida. O quiciaes namás que’l continuar con una tradición que hubiere perdío la so significación orixinal y se caltuviera namás nel aspectu de continuar un arte que viniere de tiempu atrás. Comu nun ye fácile atopar certeza nenguna, que ca ún apueste pola de so y, mentantu, deleitese apreciando esti arte tan de nueso y que munches vegaes nun sabemos nin que esiste.

Panera col solhorru zarráu de cebatu y correor.

Caseríu con panera llevantá sobre muria