Guetar n'esti blogue

viernes, 8 de junio de 2012

Arde Asturies


       Toi de pie nel andén 2 de la estación d’Uviéu. El tren de les 14:00 nun pasó, el direutu de y cuartu tarda más de lo normal. ¡Los mineros que cortaron les víes! Oise dicir a daquién ente’l magallu xente que espera mirando impaciente’l reló. Décimu díi de manifestaciones y lo que yos queda. 


 Al mio rodiu entamen a surdir les más estremaes opiniones: que si son unos vagos subencionaos, que ganen perres asgaya y xubilense a los cuarenta, que si hai que lluchar por defender lo nuestro, que si sólo nos joden a los demás... milenta opiniones. Ya equí va la mía.


La mineria n’Asturies nun tien futuru. Hai que lo reconocer. Ye más baratu trayelu d’otros llaos nos que se saca en mines a cielu abiertu con grandes desmontes. Eso y manu d’obra más barata ye más de lo que la minería astur pué soportar. El seutor, en si mesmu, ya nun tién la importancia económica que tinía delles déquedes atrás. Unos puquitinos miles d’obreros, que nun lleguen ni a la décima parte de los que trabayaben nes mines a metanes el sieglu pasáu. Ensin embargu, la mineria sigue siendo el coral d’Asturies, el alma de les cuenques. Un sentimientu que percorre por dientro de la clase obrera asturiana. Ye más que dedicase a sacar mineral de dientro la tierra. Ye la alcordanza d’aquella xente que entamo revoluciones obreres, una masa formidable y temible que resistió a ejércitos profesionales agarrándose d’uñes y dientes a les peñes de los cordales. Los mesmos que montaron les primeres güelgues de la dictadura, los que dieron lluz a les comisiones obreres. Son, pesie a quien yos pesie, l’espiritu lluchador d’esta tierra.

 
Cuando corten la carretera, o’l ferrocarril, yo nun veo molesties pa mi. Lo que veo ye un movimientu de protesta que tendría que dir secundao por toos nos. Puquitín a pocu van zarrando el xugu alrodiu’l nuesu pescuezu, apretando fuerte ensin llegar a afoganos. Van quitandonos los drechos ganaos en munchos años de llucha pero déxennos el miéu en cuerpu pa que nun protestemos, nun vaigamos quedanos ensin más tovía. Vienen a dicinos que si protestamos, si lluchamos, si amosamos el nuesu desencantu, la nuesa rabia, taremos cayendo n’actitudes antidemocrátiques, pseudo-terroristes. Tornaremos a convertinos en vagos y maleantes.


Quiero mineros nes cais, cortando carreteres, llevantando barricaes. Quiero xente que faiga arrechar l’arguyu nel corazón del obreru, que-i faiga escamplar la mente de los ñubarrones del miéu. Xente que nos puxe a les cais, a deciyos que esto nun ye lo que queremos. Que nosostros nun somos los que dábemos llicencies de contrución a manzorga y mandrecha. Nosotros nun saquemos ná de les stock options y nun xugabemos a la bolsa. Nosotros nun tábemos en dengún conseyu alministración de Caxa Madrí, CAM o Caxastur. Nosotros si pagamos el IBI, el IRPF, el IVA y tolos impuestos que nos calcaron. Y les nuestres families, la mía al menos, nun tiníen 2000 millones escaecíos en bancos suizos.

         Quiero mineros nes cais, repito. Y tresportistes. Y metalúrxicos. Mélicos, profesores, funcionarios y camareros. Quiero que to’l mundiu salga a la cai, que-i prenda fueu a Asturies, a España ya Europa entera y yos diga a esa triba mangantes que nos gobiernen que no, nel nuesu nome non.

3 comentarios:

  1. la que se lio en ciñera hoy!!!
    http://www.leonoticias.com/frontend/leonoticias/Batalla-Campal-En-Cinera-vn99660-vst445

    ResponderEliminar
  2. Y la prensa nacional escaeciéndose de tóo...

    ResponderEliminar
  3. compañero paso esta página pa un colega! es que en cataluña y el resto de españa estes coses no lleguen!!

    ResponderEliminar