Alborada de fueu

Les seis y media la mañana. Cuéstame caltener los gueyos abiertos y fixar l’atención ne mi llabor. El trabayu va acumulándose y eso que entá nun paré. Acostase a medianuechi y llevantase a les tres y media. Asina un dí tres d’otru. Llévome la taza col café a los llabios. Ya nun soporto ni el tastu nin el golor, pero la cafeína que me percuerre por dientro ye la que me mantién en movimientu, la que-i torga al párpagu zarrase ya la mente dexase cayer nun pozu somnolencia. Miro de nueves el reló. Quédame entá llabor hasta’l meudía. Hai que chai filosofía al asuntu.

Echo un güeyu al traviés del cristal. Dexó de llover. Pero’l vientu entá nun amainó. La mar tien un tonu verdosu perguapu, mestu del azul del agua ya’l naranxáu del sable. La resaca tien to’l fondu revueltu. Les gaviotes, esnalando unes, otres posaes na mar, llancen los sos chirríos que llamen a mar.

Torno la cabeza pal otru lláu, pal de tierra, au tá’l puertu ya’l pueblu rodiaos por una cordalera rocosa, de monte baxu, casique ensin árboles. Nun ye de gran altor pero al tar tan averao a la mar destaca enforma escontra’l horizonte.

El cielu ta prietu, tremao de cúmulos, ensin lluz denguna, albidrando pol xurdir del sol que ya ta’l cayer. Un nueu día, un día más, igual que los anteriores. O non.

El cielu aclaria por llevante, xusto detrás de lo más cimero del cordal. La lluz del sol n’esa alborá de primavera entama a filtrase ente les ñubes. Seliquino al entamu, el brillu aumenta en intensidá  a un ritmu inusitáu, pero la cerrazón de le ñubes  recluye l’albor a un puntu namás, xusto enriba´l pueblu. La lluz dexa de ser lluz pa tornase en rellumu, rellumu que ciega los güeyos, que refléxase nel espeyu de ñubes, que pinta los montes de collores escesivos, roxos, moraos. Atras quedo’l verde mate de los matos o los ocalitos. Les peñes, el gris del calizu, difuminase somorguiao ente’l resplandor. 

Cansáu quiciaes d’esperar pol branu, afogáu dempués de tantos díes de ñubes y orbayu, azotáu pol nun parar de vientos fríos de salitre, el Sol decide imponer el so criteriu, prendiéndoi fueu al cielu. Marcando territoriu. Ablucando a homes y animales col so esplendor, col so poder. La cafeína nun me fai efeutu. El párpagu nun quier zarrase, y la mente, sobrecoyía, abeyase en guardar eses imáxenes nel requexu los recuerdos. Les gaviotes callen y miren colos sos güeyos prietos que rellumen de gozu. Esti ya nun ye un albor normal d’un día más, ye una alborá de fueu. 

Nel silenciu que nos acuca namás que’l vientu, puxando con enfotu les foles escontra playes y cantiles, dexa oyer la so voz, un mermuru roncu y oscilante, pa nun dexanos escaecer que, pesie a tóo, el branu entá nun llegó.