Guetar n'esti blogue

miércoles, 21 de septiembre de 2011

Caleyando polos montes de Tudela

     Los montes de Tudela son un cordal asitiaú al sur del conceyu d'Uviéu, na llinde colos de Llangréu y Mieres. Forma la llende sur del antigüu conceyu de Tudela, nel valle del mesmu nome que forma'l Nalón ente la foz de Entepeñes y el valle d'Olloniegu. Nesti cordal allúgase la mayor altura del conceyu d'Uviéu, nel Picu Escobín o Picayu, con 714 m. Comu si se tratare d'un mundiu en pequeñu, n'ellos puen atopase una enorme bayura de paisaxes, dende los petreos roquedos calcáreos na fastera oriental, onde les canteres de piedra y cementu tarazen los cumales hasta los conglomeraos na fastera ocidental, pasando polos valles magrizos au, notros tiempos non bien alloñaos, medraron los fornos de teyes y lladriyos. Vetes de carbón dieron-i un pasáu mineru que entá güei amuesa les sos güelgues: la mina'l valle, el cestu, el fornu, el pozu Olloniegu, milenta chamizos y trincheres de esplotaciones a cielu abiertu. Llavaderos de mineral somorguiaos nun mar de felechos, vagonetes escaecíes nes caleyes o bocamines zarraes.

El Picu Castiellu dende'l Berrubia
     De la cordalera principal van saliendo vallinos estrechos formaos por reguerinos de pocu caudal que diben finando nel Nalón. A la vera d'estos, na parte más baxo, xurdieron los pueblos y llugares, y les sos fasteres foron camudando dende'l monte xabaz a la igüa d'un monte baxu d'aldea, nel que los praos de pastu entemecense coles pumaraes o los castañeos. Angüañu, pol abandonu del ganáu, munches d'estes corraes foron invadíes pola sebe, polos árboles, tornando puquiñín a pocu al so xeitu de monte xabaz, pero entá queden caleyes y pistes que nos permiten percorrer estos llugares y esfrutar de biesques de castaños y fayes, ablanos y carbayos, xardones, cerezales, mofu y felechos y milenta coses más. Arriba, onde´l bosque autóctonu muerre, ellí onde los llabores mineros abandonaos lo permiten, nacen ocalitalesy pinares, agarraos colos sos raigaños a tierres probes y roca desnuda. Un llugar au podemos atopar toa triba d'animales, dende les gafures y rancuayos nos bebederos pal ganáu, a les sacaveres y culiebres que anden polos praos, porcuspines ya melandros, esquiles, curuxes y raitanes. Raposos, xabariles, y arribón, el llagartu verdinegru asoleyando ente les piedres. Y munchos, munchos otros más que dan-i a biesques y cotollales un aliendu de vida fabulosu.

La natura, cuando el home se va, torna polo suyo
    Hai dellos caminos que se puen facer. Pué subise dende Olloniegu, por onde la torre del pozu, siguiendo una caleya na que puen vese losrestos de la caxa d'una antigua carretera, ensin acabar, que tinía que xunir Uviéu con Mieres ensin tener que pasar pol Padrún. Entá güei queda un tunel d'hormigón de más de 50 metros en metanes el monte, medio somorguio ente escombros y barru. Tamién pue dise por Veguín, pasando xunto lo que yera la mina'l cestu ya la mina'l valle (au dexara la so vida el güelu que me dio nome). Pue dise pola Mortera, pasando xunto'l castiellu Tudela y caminando a la vera los grabaos del Picu Berrubia. Puen facese a la fin munchos caminos, toos ellos bien prestosos. A mi, personalmente, el que más me presta ye el xubir por Tudela Agüeria, la antigua capital del conceyu, pol camín del Molín, pa dir dempués pol de Feleches y llegar a Les Mines, pa dempués tornar a mandrecha siguiendo tola cordalera hasta algamar el Picu Berrubia, baxando dempués hasta les mines d'Olloniegu. Esti camín permíteme atopar con toles ayalgues que guarden estos montes, dende les mates de castaños, los carbayones a la vera'l camín, o los peñatos enllenos de fósiles marínos, ensin escaecese de les vistes que dende lo alto puén algamase a ver. Los petroglifos merecen una reseña aparte. Aunque desconocíos pol común de la xente, los grabaos del picu Berrubia son la más grande y variada estación arqueolóxica asturina d'esti arte, sicasí, el Peñatu de Llanes seya'l más nomáu ya'l más espectacular. Cunta la lleenda que estos grabaos dexaranlos los misteriosos moros, y n'ellos dicíase, a quien fuere a descifralos, au se podía atopar una ayalga tapecía. Equí podemos atopar, munches vegaes ocultes pal güeyu nun avezao, figures antropomorfes, cruces, ferraures, trazos lliniales y cazoletes, ídolos reticulares, etc. Prometo más alantre facer un artículu a fondu pa amosar esta maravía.

La peña les ferraures del Picu Berrubia
    Parte'l camín dende'l campu la ilesia de Santiago, en Tudela Agüeria. una pista hormogoná que sube seliquino ente muries de praos y sebes, dexando'l Molín a mandrecha, ruaos pol correr del regueru no fondo'l valle. Atopamos al llegra al Molín, malamente, a manzorga'l camín, los restos d'un fornu teyes que ellí esistiere, pudiéndose apreciar nos praos les marques de los trabayos d'estración del magre. Seguimos el camín principal ensin dexalu pa tomar nengún de los ramales que dacuando van xurdiendo pa dir a los diferentes zones de praos o pumaraes. Asina diremos dexando atrás les caleyes que dirán pa la Fuente'l Cura y el Castañéu'l Sol, la que va pal Cantu la Flecha, etc. A medida que avanzamos el camín tórnase más y más pindiu, especialmente al algamar la parte na que desapaez l'hormigón. Adientrámonos nuna zona na que la biesca gana terrén, especialmente castaños y ablanos, nel que entá se abre dalgún práu coles muries d'una cabaña cayía. Equí puese ver una pequeña maravía de la Asturies rural, desapaecía pol abandonu y el hormigonáu de caminos y caleyes, y que remóntanos a una teúnica constructiva de caminos enraigoñá con Roma. N'otros tiempos, cuando'l home usaba tolos díis el monte pa trabayar, pa dir de un pueblu a otru, etc, col fin de permitir el bon usu de los caminos colos rigores del iviernu, estos solíen cubrise con una calzáa de piedres al xeitu de les calzaes romanes. Asína evitabase el enllamorgáu de los caminos y que foren fácilmente prauticables polos paisanos, el ganáu, carros y montures pesie lo que lloviere. Estes calzaes foron desapareciendo pol abandonu, pol asfaltáu o pola apertura de pistes pala tala de mates. N'esti tramu de caleya entá puen apreciase estes calzaes, nun siendo l'únicu, por suerte, que entá asina queda por estos montes.
Restos d'una herencia cultural de milenta años
    Dexando atrás la parte más frondosa de la biesca autóctona entramos nun ocalital, formáu casique enteru por árboles mozos, de pequeñu tamañu, emplegaos antañu nos llabores mineros pol so bien resistir la humedá. Tamós llegando a les mines, na parte alta del monte, onde años atrás abrieronse chamizos y esplotaciones legales, un llugar nel que les vetes de carbón amestense cola roca y el conglomeráu en sentí horizontal. Hai pocos años tovía se ficieron trabayos a cielu abiertu aquí. Ye un llugar de suelu probe, nel que a poco qu'escarbes atopas roca. Los árboles nun son a medrar más que en llugaes aislaos. Ye terrén de monte baxu, tierra de cotolles y caballos sueltos, dende la que acolómbrase la ciudá d'Uviéu per enriba San Esteban de les Cruces. Dende esti llugar, no centro la cordal de los montes de Tudela, pue tomase camín  que nos lleve a Veguín o Anieves, o al mesmu conceyu Llangréu. Si tornamos a mandrecha podemos dir hasta'l picu Gúa, au se asienten los únicos túmulos neolíticos catalogaos nel conceyu d'Uviéu, siguiendo un camín que trescurre polo alto los cumales, cruciando picos y mayaos camín de Mieres. Tomando camín pal norte podemos averanos hasta el Berrubia, y un poquitín más abaxu les Escobadielles y el Picu Castiellu, na Fócara.

Camín de Feleches
     A metanes del camín que xune les Mines col Berrubia, parte un pista de tierra que desciende rápidamente camín de San Frechoso onde, averao al regueru que-i da nome al valle, ta el Pozu Olloniegu. Esta pista baxa primero ente les cotolles que cubren la pindia cara oeste del cordal del Berrubia, pa dir dempués somorguiándose de nueu en monte atlánticu y praos de pastu, pasando averaos a varios caseríos y finando xunto les instalaciones mineres güei tristemente abandonaes.
Castillete del pozu Olloniegu. Semeya de Adrián San Mrtín Prieto (Archivo Histórico Minero)
P.S. - La vida nun yemás que un dir y tornar, siguiendo milenta vegaes el mesmu camín que un día tomamos. Dexo esta nota au bien tinía que dir un post que dexare dellos meses atrás (Tornando a la mar) , y ye que mañana taré camín de Portugal, onde espérame'l barcu nel que pasaré los prósimos meses navegando por Africa y norte d'Europa.
    

sábado, 10 de septiembre de 2011

Torres y Castiellos pol valle'l ríu Trubia

     Ye'l valle del ríu Trubia un de los llugares más guapos que n'Asturies puen atopase. Dende la mesma Trubia hasta algamar Llión al otru llau los puertos de Güeria (llugar impresionante) o Ventana, cruciando los conceyos de Uviéu, Santu Adrianu, Proaza, Teverga y Quirós, a lo llargo d'unos valles estrechos enmarcaos por montes de calizu y biesques autóctones, son a atopase munches ayalgues naturales, etnográfiques ya hestóriques. De dalgunes d'estes caberes son de les que voi falar, en concretu de los castiellos y torres que entá güei pueblen estos valles.

     Durante cientos d'años per estos montes tevo'l principal camín d'entrá n'Asturies, el Camín Real de la Mesa, lo que fizo que'l control d'esti vial fuere vital pa caltener una posición de poder n'Asturies medieval. Asina foi que d'estos valles salieren dalgunes de les más poderoses families de la nobleza astur comu los González de Tuñón o los Bernaldo de Quirós. Como amuesa del so poder y col fin de caltener el control del Camín Real y los pueblos de la redolada, xurdieron castiellos, torruxones y palacios fortificaos. Asina nomes comu Buanga, Alba de Quirós, Alesga o Proaza pasaron a formar parte de la hestoria medieval d'Asturies, siendo actores de les páxines más axitaes d'aquel entós. Nun ye'l mi procuru el d'asoleyar un estudiu sesudu de tolos castiellos y torres que puen atopase. Falaré de dalgunos d'ellos, dando dalgún datu y cuntando dalguna de les hestories que entá güei resuenen ente les sos muries. De xuru que munches otres quedarán al marxe, pero eso pue iguase nel futuru.

     Entrando nel valle, dexando atrás el conceyu d'Uviéu, au se puén atopar los restos del Castiellu de Buanga, nos montes de Trubia, ya'l conceyu de Santu Adrianu, nel que tamién se tien recoyío la esistencia d'un castielu nel picu Collaín, atopamos la primer torre, la de la casa de los Vazquez de Prada. Ye esta torre lo que queda dún conxuntu señorial que tien orixe nel sieglu XIV. Antañu la fortaleza, que controlaba la mesma vega ya'l Camín Real, tinía dos torres cuadraes xuníos por un bloque residencial. Angüañu namás queden en pié un de les torres y restos de muries de construciones anexes d'orixe postreru. La torre ye de planta cuadrada, tien tres altures y ta rematá con teyau a cuatru agües. Pesie a tar asitiá nun llugar bien guapu, a la vera'l trubia y rodiáu d'arboles, el casu ye que ta casique abandonáu, sin que se-i faigan trabayos de restauración/caltenimientu. Quiciaes el díi que caiga abaxo la torre baxo'l pesu los años, la hestoria, el podrigañu y la humedá daquién na casa'l conceyu o la conseyería cultura se lleve les manes a la cabeza.

Torre de la casa de los Vazquez de Prada
     Deseguío, namás aportar a Proaza, atopamos un de les construciones que en meyor estáu se conserven. Ye la nomá Torre de Proaza, del Campu o de los González de Tuñón. Esti torruxón, de planta circular y diámetru descendente a midía que asciende n'altor, tien cuatru altures. Ta construyíu, como yera vezu, de sillarexu les muries, y sillares los vanos. Les muries son, comu ye d'imaxinar, de bon grosor, tremaes de saeteres y dalguna ventanina. Tien tamién dos puertes d'acesu feches con sillares y arcos oxivales, una na primera planta y la otra na segunda. Esta taba fecha pa permitir la entrá al traviés d'un puente llevadizu. Ye tamíen curioso ver como'l regueru que pasa al llau fai casique un circulu al rodiu la torre, y ye que'l cursu d'esti foi desviáu pa facer d'elli el primer aniellu defensivu al xeitu d'un fosu que de xuru daría pasu a una empalizá de maera. L'orixe del torruxón ta nel sieglu XV, cuandu la mandara construyir un noble local, Diego Vázquez de Prada con permisu de los Reis Católicos.
Torre del Campu
     Nel conceyu de Proaza entá puén atopase d'ellos restos más, un de los cuales ye'l castiellu de Proaza, asitiáu na Peña Castiellu, na  redolada del pueblín de Proacina. N'esti castiellu, güei destruyíu y del que namás puén acolumbrase dellos restos llibrose batalla ente les güestes del conde Gonzálo Pelaez, posesor del castiellu, y les tropes del Rei de Alfonso VII de Castiella durante'l segundu llevantamientu del noble astur. Cuenten les cróniques que tando la plaza sitiá poles tropes del rei castellán, el mesmu Alfonso foi derribau al ser asaetiáu el so caballu, tras lo cualo llevantó'l sitiu y abandonó les Asturies, dexando la llucha xabaz escontra les güestes de Gonzalo Pelaez en manes del so enemigu cabezaleru n'este tierres, el conde Suero Bermudiz. Dalguna vegá, ya seya por tracamundiu del nome ente'l castiellu ya la pola de Proaza, allugose esti combate na torre del Campu, pesie a ser de cronoloxía posterior. Amás, hai de tenese en cunta que los castiellos d'esa dómina (sieglu XII) taben emplazaos siempre n'altor. Yeren construciones pequeñes, con poques estructures, nos que les fuercies ellí acantonaes nun pasaben, nel fragor de la batalla, de dos o tres docenes d'homes. En tiempos de paz, los llabores de control del territoriu o cobro d'impuestos podíen tar en manes de media docena de homes d'armes.

     Siguiendo camín de los puertos, desviandonos a mandrecha, al final d'una carreterina que serpente per ente montes y praos, aportamos a Banduxu, un de los pueblos más guapos y pintorescos d'Asturies. Tou el formáu por cases de piedra y maera que guarden con procuru el xeitu de la tradición, ensin romper col aire medieval que la torre de Banduxu, la ilesia románica de Santa María o'l cementeriu (asitiau en metanes l'aldea) i dan. La Torre de Banduxu, o de los Tuñón, tien orixe tamién nel sieglu XV. Tien un aire a la de Proaza, aunque equi entá conservase toa ella en bon estáu, estructures interiores inclusive. Esta torre, circular, de mampostería y sillarexu, sillares en vanu, con ventanines y saeteres ta llevantá enriba una llosa en metá del pueblu. No alto la torre pue vese el escudu heráldicu colos blasones de los Tuñón, los Miranda y los Banduxu con una torre en mediu de dos llances.

Banduxu
     En Banduxu hai otra ayalguina que nun tenemos que escaecer aunque nun seya'l oxetivu d'esti post: los horros. Tienen estos horros la peculiaridá de tener, amás de dalgún de los grabaos tan típicos nos horros astures, de pintures, pintures nes que se puén ver caballeros lluchando (un d'ellos en suelu col caballu asaetiáu, quiciabes representando les lluches de Gonzalo Pelaez ya Alfonso VII nel s. XII), llobos, etc. Alcuérdome de ver una figura d'un guerreru a caballu asemeyau a los que amuesense na famosa diadema de Moñes.

Un de les pintures que puén atopase nos horros de Banduxu
      Dexando al llau restos d'otros torruxones y castiellos aportamos al conceyu de Quirós, nel que tienense noticies de la esistencia de cuatro fortificaciones, dos d'elles desaniciaes, otra entá sin localizar y la cuarta, un de les más famoses d'Asturies, el Castiellu d'Alba de Quirós, guardián de les Asturies. Asitiase el castiellu d'Alba nun picayu rocosu a la manzorga de la carretera que sube a Faéu y Fresnéu dende Arroxu. Esti castiellu, somorguiau baxo un mar d'árboles y sebes, entá dexa ver restos de les muries así como dalgún restu de un alxibe pal agua. Construyíu nun llugar de acesu abegosu la so defensa sofitábase na inacesibilidá que'l llugar i daba, pues al tar enriba d'un crestón rocosu cayendo parte de les muries al filu'l cantil con unos pocos soldaos podía enfrentase a fuercies muy superiores. Tevo esti castiellu muncha importancia nos llevantamientos del conde Gonzalo Pelaez escontra Alfonso VII, siendo sitiau ya incendiáu por esti caberu. L'orixe del castiellu entá nu ta perclaru. De xuru pue dicise que les ruines que agora podemos visitar son de dómina baxumedieval, nun pudiéndose descartiar que d'aniciu fora un castiellu o torruxón de vixilancia de la vía romana, que se caltuviera n'usu cola llegada de los pueblos visigodos y la posterior llucha escontra los musulmanes, al ser un de les primeres fortaleces que'l invasor diba atopar al entrar n'Asturies Trasmontana dende les tierres llioneses.

Restos del Castiellu d'Alba de Quirós
      Recoyéronse d'esti castiellu lleendes de ayalgues tapecíes polos moros, falando de antiguos tuneles que partíen del castiellu y llegaben a la vera'l ríu. Esta lleenda ye percomún en, polo menos, tol ocidente peninsular, atopándose en otros munchos castiellos y torres, comu ye'l de Tudela, que según dicíen tenía un tunel que llegaba al mesmu ríu Nalón, que güei ta a dos o tres kilómetros de distancia.

    Tomando un desvíu nel pueblu de Caranga Baxu entramos nel conceyu Teverga. Equí tenemos un pequeñu valle a la solombra la peña Sobia que vién dende'l puertu ventana, puertu de entrá del Camín Real de la Mesa. Ye'l conceyu Teverga llugar bien pobláu de castiellos. Asina podemos atopar los restos del de Urria, Picu La Peña, Orcechón, Monreal o Miranda, pero, ente toos ellos destaca el Castiellu d'Alesga (preciosu topónimu) nel pueblu del mesmu nome, controlando les sos ruines la carretera que baxa del puertu Ventana, vixilando les sos muries el nueu Muséu de la Prehistoria. Esti castiellu tien, cuandu menos, orixe baxumedieval, pues ye citáu na donación del Monesteriu de Corniana a la Orde de Cluny en 1122, aunque pola so posición de control na entrada del valle de Teverga tras dexar la foz de la estrechura, nun ye descartiable que tuviere orixe romanu.

Llienzu del cuerpu principal del Castiellu d'Alesga
      Llevántase el castiellu nun promontoriu rocosu no alto'l pueblu, nun llugar dominante en metanes la vega. La parte sur, la que da a Ventana, como si ya tuviere claro nos tiempos de la so formación que dalguna vez sedría'l posadoriu d'una fortificación, ye enforma abrupta, con un pequeñu cantil nel que la roca natural da pasu a les muries de mampostería. L'otru llau, el norte, fórmalo una baxada pindia angüañu cubierta de biesca y praos nos que pacen col so mirar murniu vaques roxes de los valles. A diferencia del Castiellu d'Alba, al de Alesga pue llegase ensin demasiaes torgues. Arriba puen albidrase, enterraos ente maleza, ablanos y los mesmos escombros de les muries, un par de torruxones asína como un bon llienzu de muralla, que entá güei llevanta varios metros dende'l suelu. Ye una pena que col trabayu y les perres que dexaron na costrución del citáu museu a pocos metros del castiellu naide se decatase del gran interés que estes ruines puen tener pa dotar al conceyu con un llugar de indubiable interés cultural, y de facil acesu col que dar mayor interés al visitante.

Un de los torruxones que caltién el Castiellu d'Alesga

     Prestaríame, pa finar, animar a la xente que se pierda dacuando por estos valles nos que la hestoria d'Asturies dexó güelga dende los primeros tiempos, unos conceyos nos que lo mesmo podemos atopar saltos d'agua que biesques tupíes, grabaos neolíticos, complexos karsticos, llagos y llagunes, castros, horros y molinos, túmulos ya dólmenes. Toa una triba ensin fin nun paisaxe máxicu comu los puertos de Güeria o les foces que abren los regueros polos montes. Una ayalga cerquina que comu máquina del tiempu tresportanos al nuesu pasáu.

    

domingo, 4 de septiembre de 2011

Semeyes de biesques n'Asturies I

     Nun soi fotógrafu aficionao. Los mis intereses nun van más allá de pulsiar el botón de la cámara y dexar qu'ella faiga lo demás pero n'eses caminaes pelos montes, díis d'andariegu por caleyes somorguiaes n'árboles, baxo esti cielu nuesu, bañaos de lluz intenso, de la claridá seliquino del cielu prietu, o antroxaos ente solombres de borrina, péteme recoyer col oxetivu dalgún d'esos momentos, requexos de biesques, de muries y natura, que amosen lo que ye el monte asturianu. Tueros podríos cubiertos de mofu verde, húmedu, blandino. Muries zarrando mates, marcando caminos. Biesques de seronda convertíes en llaberintos de ramasca, alfombraes de fueyes seques.

     Siempre me prestaron eses imaxenes, dalgunes de les cuales quedaron grabaes, con mayor o menor esitu, na memoria dixital. Intentaré dir espublizándoles poquiñín a pocu. Pa entamar, delles feches nel branu del 2007 caleyando polos montes de Sobrescobiu y Llaviana na fastera del monte La Xamoca. Semeyes de biesques frondoses, húmedes, amosando tol so esplendor nun díi soleyeru comu pocos viere. Que vos preste.

 
Ramasca asgaya 1
Tresvirtiendo frutos

El tronu'l Busgosu

Camín del paraísu