Guetar n'esti blogue

martes, 16 de agosto de 2011

Tres les güelgues del mio pasáu: L'entamu

D'un tiempu a esta parte ando a la gueta ente archivos ya recuerdos, de la hestoria de dellos de los mios antepasaos, aquella xente que nun conocí, que llucharon y, dalgunos, morrieron na guerra civil que esti añu cumple el so 75 aniversariu.

Entá ye poco lo que pude atopar. Casique nun queda naide que seya a cuntame daqué de les hestories que aquellos cuntaron. Cachinos sueltos, "paezmes" y "creos", rellatos inconexos, abegosos d'allugar nel tiempu y la xeografía.

N'esta xera calténgome, guetando perequí ya entrugando perallá. Recibiendo más negatives que datos, pero puquitín a pocu, atropando informaciones coles que dir dando-i forma a esti proyeutu entamáu col nidiu oxetivu de saber, conocer daqué d'aquella xente que anates que yo trió esta tierra.

Una tierra na que vivieron, llucharon y morrieron. Una tierra que nos heriedamos.

Esta xente, estos nomes, nunca nun saldrán nos llibros d'Hestoria. Nun foron namás que xente normal somorguiaos nuna marexá de pasiones radicales. Foron dalgunos d'esos homes que nun robraben la Hestoria: faciénla. Sirva yo dendi esti requexu pa dir col tiempu allumando dalgunes de les sos hestories personales, nuna dómina marcá a sangre y fueu. Sirva yo pa nun dexar que`l so ser caiga a la fin nel sen del escaezu.


No hay comentarios:

Publicar un comentario