Asturtsalia: Pastor Vega Tembrás, quintu na guerra Melilla (1ª Parte)

Tres les güelgues del mió pasáu. Cap. I

Hai dellos antepasaos na vida de ca ún que nunca nun son quienes a facer actu de presencia. Sicasi, dacuando, apaecen como rescamplíos alrodiu la charra que caltienen los más mayores cuandu echen la vista atrás. Son aquellos que morrieren cuantayá, aquellos que naide llegó a conocer. Pastor Vega Tembrás ye ún d'ellos. Foi el mi bisgüelu y morrió lluchando coles milicies populares allá pol mes d'ochobre del 36, nos combates del Escampleru, tratando de frenar la ofensiva franquista que pol frente'l Nalón aporfiaba por francer el cercu a Uviéu.

Pastor nació en Galicia, na aldea de Santa María de Recemel, nel conceyu d'As Somozas, provincia de La Coruña el 1 de marzu de 1885. El 1 d'agostu de 1905 sedría filiáu nel exércitu como soldáu de reemplazu por un periodu de 12 años. Esto nun quería dicir que pasara inmediatamente al serviciu activu, sinón que caltendríase na reserva mentantu l'exércitu nun lo reclamara.

Ilesia de Santa María de Recemel

      El 4 de xunu de 1907 ingresaba na 3ª compañía del 2º batallón del Reximientu d'Infantería Zamora Nº 8, asitiáu n'El Ferrol. Por delantre-i quedaben unos 3 años de serviciu militar nun acantonamientu cercanu a casa, pero dellos acontecimientos que asocederíen en Melilla en 1909 tornaríen toa esta hestoria.

     En 1909, España yera un país empobrecíu, gobernáu por una clase política entá señardosa del imperiu colonial perdíu dos décades atrás. Nel repartu que se fexo d'Africa ente les potencies europees España quedó casique fora del pastel, quedando postergada a potencia de segundu orde. Tévose que conformar con un migayín del norte marroquí asina comu col desiertu costeru saharaui, el Ifni que conquistara na guera hispano-marroquí de 1860, asina comu la Guinea y Fernando Poo que-i cedió Portugal, otra potencia venía a menos pero que cuntaba col sofitu del so aliáu hestóricu: Gran Bretaña.

     El gobiernu español quería dir espardiendo'l so control sobre los territorios nos que, tres la conferencia d'Alxecires de 1906, se-i había concedíu el protectoráu, pero tenía a la contra la hostilidá de munches cábiles rifeñes que nun aceutaben l'autoridá del Sultán de Marruecos sobre los sos territorios, nin reconocíen los alcuerdos d'influencia hispano-francesa qu'elli robrara sobre'l Rif. Tres d'una serie d'enfrentamientos a lo llargo de 1908 ya entamos de 1909, nel mes de xunetu los rifeños atacaron el ferrocarril que xunía Melilla coles mines de Beni Bu Ifur, actu que aprovechó'l gobiernu español pa entamar una operación de castigu escontra les cábiles vecines, nuna operación que tenía que apurriyos prestixu ya una mayor autoridá sobre los habitantes del Rif. El gobiernu ordena'l unvíu de delles brigades formaes na so mayoría por soldaos que taben na reserva y por quintos. Hai que reseñar que n'aquella dómina el serviciu militar nun yera universal comu lo foi dempués, sinón que ca conceyu aportaba una cuota de quintos en función del númberu de mozos disponibles. La llamá a files determinábala un sortéu. Si ún de los agraciaos podía pagase una cuota de redención quedaba llibre de prestar el serviciu. Tamién podía pagar a otru mozu esentu pa que fora nel so llugar. Esti procesu desendolcó en que a la fin les milicies tuvieren formaes nos cuadros más baxos por xente de los seutores más probes de la sociedá, especialmente n'aquellos apostaeros menos petecibles comu yeren los africanos, o nes unidaes que diben destinaes al frente.

Sortéu de quintos

El unvíu de esti continxente de tropes lleva a los mandos militares melillenses a aniciar una ofensiva sobro'l macizu del Gurugú, dende'l cual los rifeños diben presionando la ciudá al tiempu que los "pacos" (francotiradores rifeños) fustigaben les posiciones españoles. La ofensiva española finó no que se llamó el desastre del barrancu del Llobu, que costó la vida a casi 200 soldaos amás de varios centenares de heridos. Les tropes tuvieren que retirase a Melilla, y el gobiernu tevo que aconceyar nueves tropes coles que reforciar a les ya acantonaes nel enclave y retomar la ofensiva. La llamá a files de nuevos reservistes tres del escalabru sofríu pol exércitu amosó'l descontentu de les clases obreres colos disturbios que dieron llugar a la Selmana Tráxica de Barcelona.

Columnes de fumu nos disturbios asocedíos en Barcelona ente'l 26 de xunetu ya'l 2 d'agostu de 1909

Cola fin d'atropar soldaos perende, treslladáronse reclutes de tolos requexos de la xeografía a dellos reximientos que teníen que partir rumbu a Melilla a nun tardar. Asina foi como aquellos acontecimientos que asocedíen a dos mil kilómetros de Galicia cruciaronse na vida del quintu Pastor Vega Tembrás, tornando lo que diba ser un serviciu tranquilu nun acantonamientu averáu al pueblu a diez meses de llucha y combates nun territroriu extranxeru, secu, ermu, sedientu del sangre que rifeños y españoles diríen espardiendo nuna guerra que intermitentemente duraría fasta 1927.